Самаробныя пачастункі, танцы і жывы куточак: у Мінску прайшло свята роднай ежы
Упершыню свята роднай ежы “Усё сваё” Мінск сустрэў у мінулым годзе. Тады, каб пачаставаць сталічных жыхароў самаробнымі прысмакамі, у сталіцу з усіх куткоў краіны прыехалі каля 10 фермераў. Мерапрыемства мінчукам вельмі спадабалася, таму новага сезону ўсе чакалі з нецярпеннем.
– Сёлета на панадворак Нацыянальнага гістарычнага музея мы з сябрамі прышлі яшчэ да адкрыцця. Паспелі паспрабаваць казіны сыр і самаробную халву. Зараз чакаем кухараў, якія рыхтуюць найсмачнейшае варэнне з цыбулі і перца чылі. На наш погляд, свята роднай ежы стала добрай традыцыяй. Дзякуючы мерапрыемству мы пазнаёміліся са шматлікімі фермерамі нашай краіны і цяпер заўсёды купляем здаровую ежу, – адзначылі наведвальнікі свята Васіль і Алена.
Акрамя самаробнага сыру і арыгінальнага варэння, на свяце можно было пакаштаваць і купіць хлеб, мёд, пернікі, цукеркі, пірагі, травяны чай і шмат іншага.
Таксама добрай традыцыяй “Усё сваё” сталі танцы, спевы і жывы куток, дзе ў гэтым годзе дзеці знаеміліся з казлянём, куранятамі і гусянятамі.
Як прайшло самае “смачнае” беларускае свята, можна паглядзець таксама ў фотастужцы 1prof.by.
Вікторыя ЯКІМАВА
Фота аўтара