«Скарбонку мілай драбязы» сабраў Нацыянальны гістарычны музей

На выставе “Скарбонка мілай драбязы” можна ўбачыць вельмі цікавыя рэчы, паведамляе сайт Нацыянальнага гістарычнага музея Беларусі.

Вітрыны выставачнай залы запоўнілі дзесяткі рэдкіх скарбонак, якія расказваюць пра тое, як людзі ва ўсе часы асцярожна збіралі і захоўвалі не толькі грошы, але і прадметы, якія мелі для іх важнае значэнне. Калекцыя ўнікальных паштовак канца XIX – пачатку XX стагоддзя нагадае наведвальнікам, наколькі важна зберагчы кожны ўспамін і кожны фрагмент натхняльнага мінулага.

Галоўная ідэя сумеснага праекта музея і банка – стварыць інтэрактыўную выставачную прастору, якая раскрывае вобраз банка як месца для добрых спраў, дзе рэалізуюцца сацыяльныя і культурныя праекты, падтрымліваецца нацыянальная культура, цэняцца простыя рэчы; вобраз банка, дзе працуюць чулыя людзі.

Скарбонка або паштоўка з доўгай гісторыяй становяцца каштоўнасцю як для чалавека, так і для музея. Захоўваць рознага кшталту “дарагія” рэчы – гэта адно з праяўленняў чалавечай натуры. Людзі ва ўсе часы і асабліва сёння цэняць старыя манеты, значкі, шкатулкі.

На выставе “Скарбонка мілай драбязы” наведвальнікам прапануюць паўдзельнічаць у майстар-класах і зрабіць памятныя здымкі на спецыяльна арганізаванай інтэрактыўнай фотазоне.

Выстава будзе працаваць з 10 па 29 сакавіка 2020 года.

Падрыхтаваў Сяргей КІРЫК

Фота з адкрытых iнтэрнет-крынiц